| تبليغات | X |
دايه مَنْديْرِ چِني؟
تيْ رَهِ شيرِ نَرِتْ دا چِه نِشِسْتي؟
كه صيادْ، لَوِ خَندونْ، دَمِ صُحوْ
مِنِ رَه زيْ و گُدَشت
دايه دَردِتْ وِ سَرُمْ
مُ چه بُگُم؟
دَردِ تو خِيلي زيادتر زِ هُنِه
كه مُ حَرفي بِزَنُم
دا!
دِلِتْ، چي يه مُرغي كه بِوُرِنْ سَرِسِه نِصْوِه
اِدونُم چه كَشِه
دا!
تو نَوني كه هَرسا اِنِشيني و اِخوني
چِطَور
اَنْجِنِنْ جونُمِه بِيتات، اي دا!
دا!
دِلُم مثلِ كَموتَر
يَه وُلا نَه
دو وُلا نَه
چه بُگُم دا؟
چَندِ ميا كه تو كَنْدي زِ سَرِت
تير خَرْدِه
چَنْدِ زَحْما كه تو وَندي مِنِ ريت
مِنِ خين دِر خَرْدِه
دا!
دِلِت خينِه
بُخون!
دا!
دِلُمْ تَنگِه
بُخون!
”چِه خووِه بِه شَوِ مَه يارِتْ وابات بو“ نِه بُخون!
”بِزني دَورِ دُنْيا تا جون وِ پات بو“ نِه بُخون!
دا!
دِلُم خينه
بُخون!
دا!
دِلِت تَنگِه
بُخون!
علي بداغي
نازنينُم!
كاشكي
اِتَرِسْتُمْ بِدِرارُمْ حاري
كه تِكِسْتِه وِ دِلِت
وِ نُوخونِ جونُمْ
سَرْوِ نازُمْ!
تيُمْ هَرْسا كه ايُفْتِه وِ تيات
تَشْ ايُفْتِه وِ دِلُمْ
تَشْ بيُفْتِه وِ دِلِس
كِه مِنِ دَشْتِ تيات
گُلِ غم كِشْتْ گُلُم
اي عزيزُم!
هَرْفَكْ
كِه مُ سِيلِتْ اِكُنُم
يادِ اَفْتَوْ دَهْرَوْ يُوفْتِه دِلُم
خينْ اِبووِه
خين وِ دِلْ با هَمُ كِه
گُلِ اَفْتَوْنِه دِرَوْ كِه دَمِ صُحوْ
زِ مِنِ دَشتِ دِلِتْ
وُ وِ جاس كِشْت تُخمِ شَوِنِه
نازِنينُم!
امّا
گُلِ سُهرِ دِلِتِه، نَكِه بِهْلي تو بِمولاهِه يه وَخْتْ
كِه زِمِستون و پُوييز
كِرْدِنِه دَسْت يكي
بِپِلاسْنِنْ گُلِ سُهرِ دِلِتِه
تا نَيوفتِه تيِسْ هَرْجِكْ وِ بُهار
سَرْوِ نازُمْ!
بِگِريوْ!
تَنْگدل بو وُ بِنال!
وِ دو تا تيتْ
كِه اَفْتَوْ وِ حياسون اِوَنِه سَر وا زير
بِنِشين حَرْس بِوار
نازَنينُم!
امّا
گُلِ سُهرِ دِلِتِه
نَكِه بِهْلي تو بِمولاهِه يه وَخْتْ
گُلِ سُهرِ دِلِتِه
نَكِه بِهْلي تو بِمولاهِه يه وَخْتْ
علي بداغي
خَوْ گِرِه يارُمِه، مِرْزِنْگاسْ ري يَكْ سِهْرِسْتْ
داد و فِرياد وُرِسْتادْ كه: اَفْتَوْ گِهْرِسْتْ
علي بداغي